MAYNILA — Inirekomenda ng Philippine National Police-Criminal Investigation and Detection Group (PNP-CIDG) sa Department of Justice (DOJ) ang pagsasampa ng kaso laban kay Ateneo basketball head coach Tab Baldwin at 10 iba pang miyembro ng coaching at support staff kaugnay ng pagkamatay ng student-athletes na sina Rene Clert Baterbonia at Divine Adili sa isang team-building activity sa Dipaculao, Aurora noong Hunyo 8.
Ayon sa PNP-CIDG, inirerekomenda nilang kasuhan ang mga sangkot dahil sa umano’y paglabag sa Republic Act No. 11053 o Anti-Hazing Act of 2018, matapos lumabas sa kanilang imbestigasyon na ang isinagawang seawater training ay maaaring maituring na hazing dahil nagdulot umano ito ng pisikal na paghihirap bilang bahagi ng proseso ng pagpapatibay ng pagiging miyembro ng koponan.
Bukod kay Baldwin, kabilang sa mga inirekomendang kasuhan ang strength and conditioning coaches na sina Grant Dearns at Ceasar Vicent Javellana Elumba; assistant coaches na sina Dean Caesar B. Castaño, Sandro Nicholas Romero Soriano, at Reynaldo Jacinto; student managers na sina Paolo Manuel Maceda Adevoso at Andrew Lorenzo “Drew” Bondoc Salud; physical therapist na si John Eric Quiambao Rueca; at utility personnel na sina Aris Ramos Pronce at Joel “Boy” Palmiano Rapa.
Sinabi ng PNP-CIDG na sa tatlong linggong imbestigasyon nito, lumitaw na ang aktibidad ay hindi lamang isang karaniwang team-building exercise kundi may kaugnayan umano sa pagpili ng final 17-man roster ng Ateneo para sa susunod na season ng University Athletic Association of the Philippines (UAAP).
Ayon kay Department of the Interior and Local Government (DILG) Assistant Secretary for Legal and Legislative Affairs Brian Mey R. Tomas, nakita ng mga imbestigador na ang training camp ay hindi lamang simpleng requirement para sa pagiging miyembro ng koponan.
Aniya, 20 atleta ang dumalo sa training ngunit 17 lamang ang mapipili para sa opisyal na UAAP lineup.
Batay sa mga testimonya ng mga saksi, layunin umano ng aktibidad na masukat ang pisikal na kondisyon at mental toughness ng mga manlalaro, sa halip na ang kanilang basketball skills lamang.
“These circumstances point to the fact that this supposed team-building is really geared towards identifying which players will be fit for the final roster of UAAP players,” pahayag ni Tomas.
Ayon naman kay Interior Secretary Jonvic Remulla, walang nakitang pumigil sa aktibidad kahit may mga panganib na maaaring kaakibat nito.
Sinabi rin ni Remulla na lima sa mga manlalaro ang nagpahayag na hindi sila marunong lumangoy bago isinagawa ang water training. Gayunman, itinuloy pa rin umano ang aktibidad habang mataas ang tubig, kung saan nalunod sina Baterbonia at Adili.
Iginiit naman ni CIDG Director Maj. Gen. Robert Morico II na wala silang nakitang pabigat sa katawan ng dalawang biktima nang sila ay matagpuan at marekober.
Samantala, nagpahayag ng pakikiramay si Ateneo President Fr. Roberto Yap at sinabi niyang patuloy ang unibersidad sa paghingi ng tawad at pagbibigay ng suporta sa pamilya ng dalawang student-athletes.
Nangako ang pamunuan ng Ateneo ng pangmatagalang tulong para sa mga naulila habang nagpapatuloy ang proseso ng imbestigasyon at legal na aksyon.
Ang Anti-Hazing Act of 2018 ay nagbabawal sa mga aktibidad na nagdudulot ng pisikal o sikolohikal na pinsala bilang bahagi ng initiation o membership requirements sa mga organisasyon, grupo, at institusyon.
DC Alviar
Professor DC Alviar is a tenured associate professor at National University (NU) Manila and a steering committee member of the Philippine International Studies Organization (PHISO). He has contributed to NU's community extension initiatives that introduced the five disciplines of a learning organization (Senge, 1990) to communities within a local government unit. He writes and edits local reports for Mega Scene. He graduated with Master of Development Communication (MDC) and Doctor of Communication (DComm) degrees from the University of the Philippines (UP) Open University in Los Baños and was awarded with a Commission on Higher Education (CHED) SIKAP grant. He previously served as editor-in-chief of The Adamson News and his high school publication Ang Ugat.
- DC Alviar
- DC Alviar
- DC Alviar
- DC Alviar
