MANILA | Naglaan ang Department of Budget and Management (DBM) ng kabuuang ₱82.998 bilyon para sa 2026 Year-End Bonus at ₱5,000 Cash Gift ng mga kwalipikadong kawani ng pamahalaan, kasabay ng paalala sa mga ahensiya na tiyaking matatanggap ng kanilang mga empleyado ang dalawang benepisyo sa unang pagpapasahod ngayong Nobyembre.
Ayon kay DBM Secretary Kim Robert C. De Leon, naipamahagi na sa mga kinauukulang ahensiya ang pondong nakalaan para sa mga benepisyo. Binigyang-diin niya na dapat sabay na ibigay ang year-end bonus at cash gift, sa halip na magkahiwalay o sa susunod pang iskedyul ng pagpapasahod.
Mula sa kabuuang pondo, ₱73.449 bilyon ang inilaan para sa Year-End Bonus na katumbas ng isang buwang pangunahing sahod ng empleyado batay sa kaniyang suweldo noong Oktubre 31, 2026. Samantala, ₱9.549 bilyon ang nakalaan para sa karagdagang ₱5,000 Cash Gift. Saklaw ng alokasyon ang mga kwalipikadong kawani ng pamahalaang sibil, gayundin ang mga tauhan ng militar at mga unipormadong serbisyo.
Sa ilalim ng DBM Budget Circular No. 2024-3 na inilabas noong Oktubre 22, 2024, kailangang nakapaglingkod ang isang empleyado nang hindi bababa sa apat na buwan o 120 araw mula Enero 1 hanggang Oktubre 31, 2026, at nananatiling nasa serbisyo ng pamahalaan hanggang Oktubre 31 upang maging kuwalipikado sa buong benepisyo.
Kabilang sa binibilang na serbisyo ang pagtatrabaho sa regular, contractual o casual na posisyon sa pambansa at lokal na pamahalaan, gayundin ang mga awtorisadong leave of absence na may bayad.
Maaaring magkaiba ang aktuwal na araw ng pagpapasahod depende sa iskedyul ng bawat ahensiya, ngunit kailangang maisabay ang pagbibigay ng dalawang benepisyo sa unang payroll para sa Nobyembre.
Hindi bago ang mga benepisyong ito sa mga kawani ng pamahalaan. Itinatag ang taunang Christmas bonus sa pamamagitan ng Republic Act No. 6686, na nilagdaan noong Disyembre 14, 1988. Itinakda naman ng Republic Act No. 8441 noong 1997 ang pagtaas ng cash gift mula ₱1,000 tungo sa ₱5,000, na ganap na ipinatupad simula 1999.
Kinikilala rin ng Republic Act No. 11466 o Salary Standardization Law of 2019 ang Year-End Bonus at ₱5,000 Cash Gift bilang mga regular na benepisyo ng mga kwalipikadong kawani ng pamahalaan.
Ayon sa DBM, tanda ng pagkilala ang mga benepisyong ito sa pagsisikap, dedikasyon at patuloy na paglilingkod ng mga kawani ng pamahalaan sa sambayanang Pilipino, gayundin ang karagdagang tulong pinansiyal para sa kanilang mga pamilya ngayong papalapit ang Pasko.
ADVERTISEMENT
DC Alviar
Professor DC Alviar is a tenured associate professor at National University (NU) Manila and a steering committee member of the Philippine International Studies Organization (PHISO). He has contributed to NU's community extension initiatives that introduced the five disciplines of a learning organization (Senge, 1990) to communities within a local government unit. He writes and edits local reports for Mega Scene. He graduated with Master of Development Communication (MDC) and Doctor of Communication (DComm) degrees from the University of the Philippines (UP) Open University in Los Baños and was awarded with a Commission on Higher Education (CHED) SIKAP grant. He previously served as editor-in-chief of The Adamson News and his high school publication Ang Ugat.
- DC Alviar
- DC Alviar
- DC Alviar
- DC Alviar
