MANILA, Philippines | Pinangunahan ng Department of Education (DepEd) noong Setyembre 3 ang sabayang National Simultaneous School Safety Drill sa mga paaralan sa buong bansa upang palakasin ang kahandaan ng mga mag-aaral, guro at school personnel sa iba’t ibang emergency, kabilang ang active threat scenarios.
Isinagawa ang isa sa mga pangunahing simulation sa Carlos F. Gonzales High School sa San Rafael, Bulacan, na dinaluhan nina Department of the Interior and Local Government (DILG) Secretary Jonvic Remulla, DepEd Undersecretary Malcolm Garma at Assistant Secretary Jocelyn Andaya.
Ayon sa DepEd, layunin ng nationwide drill na masubukan ang School Safety Contingency Plans at matukoy ang mga operational gaps na maaaring makaapekto sa mabilis at maayos na pagtugon sa oras ng emergency. Kabilang sa mga sinanay na pamamaraan ang lockdown, emergency communication, police response, first aid, headcount at reunification ng mga mag-aaral sa kanilang pamilya.
Sinuri ang mga simulation ng multi-agency observers mula sa DILG, Philippine National Police (PNP) at mga Disaster Risk Reduction and Management Office upang makatulong sa pagpapahusay ng localized contingency plans ng mga paaralan.
Binigyang-diin ni Education Secretary Sonny Angara na hindi layunin ng drill na magdulot ng takot sa mga mag-aaral kundi ihanda ang buong school community sa mga sitwasyong maaaring mangailangan ng mabilis at tamang pagkilos. Aniya, kailangang manatiling ligtas na kanlungan ang mga paaralan para sa mga bata.
Ayon sa DepEd, isinasaalang-alang din sa bagong school safety guidelines ang mental health at kapakanan ng mga mag-aaral. Trauma-informed at child-centered ang approach ng mga drill, kaya hindi hinihikayat ang hyper-realistic simulations, aktuwal na pagpapanggap bilang armadong aggressor o graphic scenarios na maaaring magdulot ng psychological distress.
Ang school safety drill ay bahagi ng mas matagal nang disaster preparedness program ng DepEd. Noong 1990, naglabas ang kagawaran ng patakaran para sa regular na calamity at emergency drills sa mga paaralan at tanggapan. Noong 2012, ipinatupad naman ang quarterly national school-based earthquake at fire drills.
Pinalakas pa ang disaster preparedness sa basic education sa pamamagitan ng Comprehensive Disaster Risk Reduction and Management in Basic Education Framework noong 2015, na naglalayong gawing bahagi ng sistema ng edukasyon ang disaster preparedness, resilience at learning continuity.
Sa ilalim din ng DepEd Order No. 53, series of 2022, inatasan ang mga pampublikong paaralan na magsagawa ng regular na earthquake at fire drills bilang bahagi ng kanilang disaster risk reduction and management efforts, alinsunod sa Republic Act No. 10121 o Philippine Disaster Risk Reduction and Management Act of 2010.
Kasabay nito, pinalalawak ng DepEd ang mga hakbang para sa school safety laban sa natural at human-induced hazards. Kabilang dito ang M7X Ready School Program na inilunsad noong Abril 2026 upang palakasin ang kahandaan ng mga paaralan sa Greater Metro Manila Area laban sa posibleng malakas na lindol.
Ayon sa DepEd, ang patuloy na pagsasagawa ng drills ay mahalaga upang matiyak na may malinaw na procedures ang bawat paaralan at alam ng school community kung paano kikilos sa oras ng krisis, habang pinangangalagaan ang pisikal at mental na kaligtasan ng mga mag-aaral.
DC Alviar
Professor DC Alviar is a tenured associate professor at National University (NU) Manila and a steering committee member of the Philippine International Studies Organization (PHISO). He has contributed to NU's community extension initiatives that introduced the five disciplines of a learning organization (Senge, 1990) to communities within a local government unit. He writes and edits local reports for Mega Scene. He graduated with Master of Development Communication (MDC) and Doctor of Communication (DComm) degrees from the University of the Philippines (UP) Open University in Los Baños and was awarded with a Commission on Higher Education (CHED) SIKAP grant. He previously served as editor-in-chief of The Adamson News and his high school publication Ang Ugat.
- DC Alviar
- DC Alviar
- DC Alviar
- DC Alviar
