MAYNILA. Sumiklab ang isang grassfire sa extension parking area ng Terminal 3 ng Ninoy Aquino International Airport (NAIA) kahapon ng hapon, Lunes, Abril 22, na nagdulot ng pinsala sa 19 sasakyang nakaparada doon, na umabot sa halagang P20 milyon.
Batay sa ulat ng Pasay Bureau of Fire Protection (BFP), nagsimula ang sunog bandang 1:35 ng hapon sa mga tuyong damo na malapit sa extension parking area ng NAIA Terminal 3. Dahil sa matinding init at mabilis na pagkalat ng apoy, nadamay ang mga nakaparadang sasakyan sa parking area.
Nagpadala agad ang BFP ng dalawang fire trucks upang tugunan ang sunog. Naideklara ang fire out alas-2:03 ng hapon, subalit patuloy pa rin ang imbestigasyon ng Pasay BFP upang matukoy ang eksaktong sanhi ng sunog.
Walang naiulat na nasaktan o namatay sa insidente. Gayunpaman, hindi naapektuhan ang operasyon ng NAIA Terminal 3 dahil sa sunog, ayon sa Manila International Airport Authority (MIAA).
Idinagdag ng MIAA na isang pribadong concessionaire ang namamahala sa nasabing parking area na naapektuhan ng sunog. Patuloy ang pakikipagtulungan ng mga awtoridad at ang pagsusuri sa mga posibleng sanhi ng pangyayari upang maiwasan ang ganitong insidente sa hinaharap.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
