Tiniyak ng gobyerno ng Pilipinas ang tulong sa pagpapauwi sa mga labi ni Wilma Abulad Tezcan, isa sa dalawang Pilipinong nasawi sanhi ng dalawang malalakas na lindol sa Turkey noong Lunes.

“As requested by the daughter and with the consent of the husband, the Embassy is arranging the immediate repatriation of the body of Wilma Abulad Tezcan,” ayon sa Philippine Embassy sa Ankara kanina.

Ang mga impormasyon hinggil sa pangalawang Pilipinong namatay, sa kabilang banda, ay hindi pa ilalabas.

Nagpapatuloy ang rescue, relief at evacuation efforts sa timog-silangan ng Turkey matapos itong wasakin ng 7.8 at 7.6 magnitude na lindol na pumatay sa mahigit 20,000 katao sa ngayon.

Habang sinusulat ang balitang ito, apat pang pamilyang Pilipino ang inilikas mula sa lungsod ng Gaziantep patungo sa kabisera ng Turkey sa Ankara sa pamamagitan ng mga sprinter bus.

Ang Gaziantep ay isa sa mga lugar na matinding tinamaan, mahigit na 200 kilometro mula sa mga nakaraang operasyon ng embahada sa Antakya, Hatay.

Sinabi rin ng embahada na ilang Pilipino ang piniling manatili sa kanilang pamilya at sa kanilang mga tahanan.

Dalawang Pilipino ang nasawi sa lindol sa Turkey at Syria na ikinamatay ng libu-libo, ayon sa Philippine Embassy sa Turkey.

Ayon sa ulat mula sa embahada ng Pilipinas sa Ankara, dalawa ang nasawi na kabilang sa tatlong Pinoy na nawawala kasunod ng 7.8 magnitude na lindol.

Ang iba pang Pinoy na naiulat na nawawala ay natagpuang buhay, ayon sa embahada.

Ang killer earthquake na yumanig sa Turkey at Syria noong Lunes ay nagsanhi ng mahigit 21,000 patay at daan-daang libo ang nawalan ng tirahan.

Hindi bababa sa 248 na Pilipino sa Turkey ang naapektuhan ng ng na lindol.

”It is with deep regret that we learn of the passing of two Filipinos in the recent 7.8-magnitude earthquake that devastated Türkiye,” ayon sa Twitter post ni Pangulong Ferdinand R. Marcos Jr. noong Biyernes.

Relief team

Noong Martes, sinabi ni Pangulong Marcos Jr na maglalagay ang Pilipinas ng 85-kataong team upang tulungan ang mga biktima ng lindol sa Turkey at Syria.

Ang contingent, na binubuo ng Philippine military personnel, engineers, at health workers, ay dumating na sa lugar at sinimulan noong Biyernes ang kanilang misyon na magsagawa ng search, rescue, relief at iba pang tulong sa mga lugar na naapektuhan ng lindol.

Natagpuang buhay ang isang Pinay na inakalang namatay sa lindol na tumama kamakailan sa Hatay province ng Turkey, ayon sa isang Filipino community leader sa Ankara.

Kinumpirma ni Cherry Santos, presidente ng Filipino community sa Turkish capital, na nasa loob ng gusali sa Hatay ang babae ng tumama ang 7.7-magnitude na lindol na nagpaguho sa mga istruktura sa sampung lalawigan. Sinabi ni Santos na ang Pinay ay kasama ng tatlong iba pang mga Pilipino, na ang kasalukuyang kinaroroonan ay hindi pa alam.

“Isang kababayan po ang na-recover na napabalita po noong una, kinonfirm po noong amo na patay na pero na-recover siya buhay po,” ayon kay Santos sa isang radio interview.

Ang Embahada ng Pilipinas sa Ankara ay nagtalaga ng isang team sa mga lungsod ng Adana at İskenderun upang ibigay ang lahat ng posibleng tulong sa mga apektadong Pilipino, kabilang ang pagkain, tubig, kumot, at pera. Ang embahada ay nakatanggap ng “steady stream of confirmed and unconfirmed” reports ng mga apektadong mamamayan at nagsasagawa ng mabilis na aksyon upang matugunan ang kanilang mga pangangailangan. Inilikas na ng embahada ang apat na Pilipino sa mas ligtas na lokasyon sa Mersin at hinihikayat ang mga distressed national na makipag-ugnayan sa hotline nito sa pamamagitan ng telepono, WhatsApp, email, o Facebook.

Naapektuhan ng lindol ang higit sa 13 milyong katao sa Turkey at Syria. Marami pa ring biktima ang nasa ilalim ng mga durog na bato ang patuloy na pinagsisikapang mailigtas. Ang bilang ng mga nasawi ay lumampas na sa 11,000 ayon sa United Nations.

Kasama ang mga urban search and rescue team mula sa Turkey at 19 na iba pang mga bansa ang pinakilos upang tumulong sa mga pagsisikap sa rescue operations. Ang humanitarian contingent ng Pilipinas, na binubuo ng 85 tauhan mula sa iba’t ibang ahensya, tulad ng Office of Civil Defense, Armed Forces of the Philippines, at Department of Health, ay umalis na rin patungong Turkey upang tumulong sa mga relief efforts.