Mga baril na ginamit sa Tacloban school shooting, pag-aari ng tiyahin na pulis at security agency

TACLOBAN CITY, Philippines — Ang dalawang baril na ginamit sa pamamaril sa loob ng San Jose National High School sa Tacloban City ay natukoy na pag-aari ng isang policewoman at ng isang security agency, ayon sa Philippine National Police (PNP), habang nagpapatuloy ang imbestigasyon sa insidenteng ikinamatay ng tatlong estudyante at ikinasugat ng iba pa.

Sinabi ng PNP na ang 9mm Glock pistol na nakuha mula sa isa sa dalawang menor de edad na suspek ay pag-aari o iniisyu sa isang policewoman na nakatalaga sa Police Regional Office Eastern Visayas (PRO 8), na tiyahin umano ng isa sa mga suspek.

“Upon verification, the 9mm Glock belongs or was issued to a policewoman assigned in PRO 8,” ani PNP Public Information Chief Col. Allen Rae Co sa isang press briefing sa Camp Crame noong Lunes.

“The subject policewoman is now under investigation and placed under the custody of the regional police office,” dagdag ni Co.

Samantala, sinabi ng opisyal na ang isa pang baril na ginamit sa insidente ay hindi pag-aari ng pulisya.

“Meanwhile, the caliber .38 revolver is registered to a security agency in Cebu City,” ayon kay Co.

Naganap ang pamamaril bandang alas-9 ng umaga noong Lunes sa loob ng San Jose National High School sa Barangay San Jose, Tacloban City, kung saan nagpaputok umano ang dalawang Grade 9 student sa dalawang silid-aralan.

Kinilala ng PNP ang mga suspek sa kanilang alyas na Nash, 14, at Rod, 15. Kapwa sila estudyante ng nasabing paaralan at kasalukuyang nasa kustodiya ng pulisya habang hinihintay ang turnover sa city social welfare department alinsunod sa Republic Act No. 9344 o Juvenile Justice and Welfare Act.

Ayon sa pulisya, tatlong estudyante ang nasawi sa insidente habang tatlo ang tinamaan ng bala. Apat naman ang nasugatan habang nagkagulo at nagtangkang makatakas mula sa lugar.

Sinabi ni Police Regional Office Eastern Visayas Chief Brig. Gen. Jason Capoy, batay sa unang pagtatanong sa mga suspek, sinabi nilang nakaranas sila ng bullying sa paaralan. Patuloy pa ring sinusuri ng mga awtoridad ang posibleng motibo sa pamamaril.

Ayon kay Capoy, walang naitalang criminal record ang dalawang suspek. Sinabi rin niyang naipasok ng mga ito ang mga baril sa campus dahil iisa lamang ang security guard na nakatalaga sa maraming pasukan at labasan ng paaralan.

“The suspects barged into two rooms because after the shooting in the first, the children scampered and the suspects apparently ran after some victims into another room,” pahayag ni Capoy sa mga mamamahayag.

Narekober ng mga imbestigador ang hindi bababa sa 40 basyo ng bala mula sa lugar. Karamihan sa mga nasawi at nasugatan ay iniulat na mga babaeng estudyante.

Naglabasan din online ang mga video mula sa loob ng paaralan kung saan maririnig ang sigawan at iyakan ng mga estudyanteng nagtatago habang may naririnig na putok ng baril.

Matapos ang insidente, sinabi ng mga awtoridad na isa sa mga suspek ang naaresto sa loob mismo ng paaralan habang ang isa ay tumakas at nagtago sa isang bahay malapit sa campus bago natagpuan ng mga pulis matapos alertuhan ng mga residente.

Iniutos ni Pangulong Ferdinand Marcos Jr. ang masusing imbestigasyon sa insidente at hiniling ang pagpapalakas ng seguridad sa mga paaralan, lugar ng trabaho, at iba pang pampublikong lugar, ayon kay Communications Undersecretary Claire Castro.

Dahil menor de edad ang dalawang suspek, ipoproseso ang kanilang kaso alinsunod sa Juvenile Justice and Welfare Act. Sa ilalim ng batas, ang mga batang wala pang 15 taong gulang ay karaniwang hindi maaaring papanagutin sa kriminal na paraan maliban sa mga itinakdang kondisyon.

Nanawagan naman ang PNP sa publiko na manatiling kalmado at makipagtulungan sa imbestigasyon sa pamamagitan ng pagbibigay ng anumang impormasyon na makatutulong sa paglilinaw ng insidente.

Bagama’t karaniwan ang mga insidenteng may kaugnayan sa paggamit ng baril sa Pilipinas dahil sa paglaganap ng ilegal na armas, bihira ang mga pamamaril sa loob ng mga paaralan.