MAYNILA — Tiniyak ng Malacañang na bibigyan si Senador Ronald “Bato” dela Rosa ng proteksiyong naaayon sa batas kasunod ng kumpirmasyon ng International Criminal Court (ICC) na naglabas ito ng arrest warrant laban sa kanya kaugnay ng imbestigasyon sa war on drugs ng nakaraang administrasyon.
Ayon kay Palace Press Officer Atty. Claire Castro, may obligasyon ang pamahalaan na igalang at ipatupad ang batas habang tinitiyak ang karapatan ng lahat ng panig, kabilang ang mga akusado at mga biktima ng umano’y extrajudicial killings.
Nilinaw ni Castro na ang parliamentary privilege ng mga senador laban sa pag-aresto ay may limitasyon lamang habang may sesyon ang Kongreso at saklaw lamang ng mga kasong may kaparusahang hindi lalampas sa anim na taong pagkakakulong, alinsunod sa 1987 Constitution.
Samantala, naghain ng resolusyon sa Senado sina Senators Vicente “Tito” Sotto III, Panfilo “Ping” Lacson, Bam Aquino, Risa Hontiveros, at Francis “Kiko” Pangilinan na humihikayat kay dela Rosa na boluntaryong sumuko sa mga awtoridad.
Sa kanilang resolusyon, iginiit ng mga senador na walang probisyon sa Konstitusyon o sa Senate Rules na nagbibigay sa Senado ng kapangyarihang magsilbing protective custody o santuwaryo para sa isang mambabatas na may kinahaharap na legal na proseso.
Binigyang-diin din nila na ayon sa Article VI, Section 11 ng Konstitusyon, limitado lamang ang immunity from arrest ng mga mambabatas at hindi ito sumasaklaw sa mabibigat na kaso o sa mga prosesong pinahihintulutan ng batas.
Kasabay nito, isang 17-pahinang petisyon ang inihain sa Korte Suprema ng senior high school teacher na si John Barry Tayam upang pigilan umano ang paggamit ng Senado bilang kanlungan laban sa pagpapatupad ng ICC arrest warrant.
Sa petisyon, hiniling sa Korte Suprema na maglabas ng writ of prohibition laban kay dela Rosa at sa pamunuan ng Senado upang hindi maharang ang operasyon ng mga law enforcement agencies sa pagsisilbi ng warrant.
Ipinapanawagan din ng petitioner na utusan ang Philippine National Police–Criminal Investigation and Detection Group at National Bureau of Investigation na makipag-ugnayan para sa koordinasyon sa pagpapatupad ng warrant.
Hinihiling din sa Korte Suprema na ideklarang walang bisa ang Senate Resolution No. 44, na nagsasaad na walang Pilipinong maaaring isuko sa foreign entity hangga’t hindi nauubos ang domestic legal remedies.
Ayon sa petisyon, hindi umano ito maaaring manaig laban sa Republic Act No. 9851 o Philippine Act on Crimes Against International Humanitarian Law, Genocide, and Other Crimes Against Humanity, na nagpapahintulot ng surrender o extradition sa ilalim ng umiiral na batas.
Patuloy na inaabangan ang magiging tugon ng mga institusyon ng gobyerno sa magkakahiwalay na hakbang na may kaugnayan sa ICC warrant laban kay dela Rosa.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflor
- Venus L Peñaflor
- Venus L Peñaflor
- Venus L Peñaflor
