MANILA, Philippines — Pormal nang nagsilbi ng mga subpoena ang Senado na nakaupo bilang impeachment court sa ilang bangko at pangunahing ahensya ng pamahalaan upang kunin ang financial records ni Vice President Sara Duterte at ng kanyang asawang si Manases Carpio. Kasabay nito, ibinunyag ng National Bureau of Investigation (NBI) na mas mababa na lamang sa 20 katao ang natitira sa kanilang listahan ng mga persons of interest kaugnay ng iniimbestigahang umano’y banta sa buhay ni Pangulong Ferdinand Marcos Jr.
Ayon kay Impeachment Clerk of Court Atty. Renato Bantug Jr., ipinadala alas-8:40 ng umaga noong Miyerkules ang mga subpoena sa Bureau of Internal Revenue (BIR), Anti-Money Laundering Council (AMLC), Metrobank, PSBank, Bank of the Philippine Islands (BPI), Security Bank, Land Bank of the Philippines, at BDO Unibank.
Inatasan ng impeachment court ang mga naturang institusyon na isumite ang hinihinging mga rekord bago mag-alas-9:00 ng umaga sa Hulyo 30.
Hiniling ng House prosecution panel ang pagpapalabas ng mga subpoena bilang bahagi ng pagbusisi sa alegasyong nagkaroon umano si Duterte ng hindi maipaliwanag na yaman. Ayon sa mga prosecutor, batay sa mga rekord ng AMLC, lumampas sa P3 bilyon ang kabuuang financial transactions na iniugnay kay Duterte mula 2007 hanggang 2013. Ang mga alegasyong ito ay kabilang sa mga usaping inihaharap sa impeachment proceedings, at wala pang pinal na pasya ang korte ukol sa mga ito.
Samantala, sa hiwalay na pagdinig na may kaugnayan sa Article IV ng impeachment complaint na tumatalakay sa umano’y grave threat, sinabi ni NBI Director Melvin Matibag na mas mababa na lamang sa 20 katao ang natukoy ng ahensya bilang persons of interest na posibleng may kaugnayan sa sinasabing planong pag-atake laban kay Pangulong Marcos.
Sa pagharap bilang huling testigo ng prosecution panel, sinabi ni Matibag na mayroon na silang mga pangalan at nakausap na rin ang ilang kamag-anak at kakilala ng mga indibidwal.
“Nagsimula po kami sa maraming pangalan and we’ve narrowed it down. Siguro ito na inaantay ng marami rin na finally ma-identify natin. We are narrowing it down already to a less than 20 individuals at may mga pangalan na po kami nito. Sa katunayan po, yung iba po rito kausap na po namin yung kanilang mga pamilya o kakilala,” ani Matibag bilang tugon sa tanong ni Senator-judge Joel Villanueva.
Dagdag pa niya, inaasahan ng NBI na sa loob ng tatlo hanggang anim na buwan ay posibleng matukoy ang personalidad o mga personalidad na umano’y sangkot sa naturang kaso.
Inihayag din ni Matibag na kabilang sa mga persons of interest ang ilang miyembro ng Vice Presidential Security and Protection Group (VPSPG). Aniya, ang yunit ay binubuo ngayon ng mahigit 300 sundalo matapos alisin ang 77 miyembro ng Philippine National Police. Sinabi rin niyang may mga aktibong uniformed personnel na kabilang sa kanilang iniimbestigahan at tinatayang nasa antas na anim hanggang pito sa sukat na isa hanggang sampu ang posibilidad na matukoy ng NBI ang umano’y mga kinontrata.
Samantala, iginiit ni House prosecution spokesperson at Lanao del Sur Rep. Zia Alonto Adiong na hindi dapat ipagwalang-bahala ang mga umano’y pagbabanta laban kay Pangulong Marcos, First Lady Liza Araneta-Marcos, at dating House Speaker Martin Romualdez.
Sa pagtatapos ng testimonya ni Matibag, pormal ding isinara ng House prosecution panel ang presentasyon ng kanilang ebidensya para sa Article IV ng impeachment complaint na may kaugnayan sa alegasyong grave threat laban kay Vice President Duterte.
Ang impeachment trial laban kay Vice President Duterte ay nagpapatuloy sa Senado na nagsisilbing impeachment court. Sa ilalim ng Konstitusyon, mananatiling inosente ang sinumang opisyal hanggang hindi napatutunayang nagkasala sa pamamagitan ng pinal na desisyon ng korte.
DC Alviar
Professor DC Alviar is a tenured associate professor at National University (NU) Manila and a steering committee member of the Philippine International Studies Organization (PHISO). He has contributed to NU's community extension initiatives that introduced the five disciplines of a learning organization (Senge, 1990) to communities within a local government unit. He writes and edits local reports for Mega Scene. He graduated with Master of Development Communication (MDC) and Doctor of Communication (DComm) degrees from the University of the Philippines (UP) Open University in Los Baños and was awarded with a Commission on Higher Education (CHED) SIKAP grant. He previously served as editor-in-chief of The Adamson News and his high school publication Ang Ugat.
- DC Alviar
- DC Alviar
- DC Alviar
- DC Alviar
