Lucena City, Quezon. Isang trahedya ang naganap sa lungsod ng Lucena matapos na tambangan ng isang naka-motorsiklong gunman ang isang empleyado ng isang multinational conglomerate. Naganap ang krimen sa Brgy. Isabang bandang ika-8 ng umaga kahapon.
Kinilala ng pulisya ang biktima na si Charles Moises Vidal, isang 33 anyos na residente ng Brgy. Ilayang Talim sa Lucena City. Ayon sa ulat ni Police Senior Master Sgt. Wilbur Schramm Apoli, ang imbestigador ng kaso, papunta umano sa kanyang opisina sa San Miguel Corporation (SMC) si Vidal nang biglang lumitaw ang suspek na sakay ng motorsiklo at mabilis na binaril ito sa ulo.
Sa sinapit ni Vidal, agad itong namatay sa eksaktong pinangyarihan ng insidente. Ayon sa mga saksi, tumba ang biktima habang nasa kanyang motorsiklo. Kaagad umanong tumakas ang gunman matapos ang pamamaril.
Natagpuan ng mga imbestigador ang apat na basyo ng bala sa lugar ng krimen, ngunit hindi pa tiyak ang kalibre ng baril na ginamit ng salarin.
Upang mahuli ang suspek at malaman ang motibo sa likod ng pananambang, nagsasagawa na ng malawakang dragnet operation ang Lucena City Police sa buong lungsod ng Lucena at mga kalapit na bayan.
Samantala, maraming netizens ang nagpahayag ng kanilang pagkadismaya sa sunod-sunod na insidente ng pamamaril sa Lucena City. Sa nakaraang mga araw, apat na pananambang ng riding-in-tandem ang naganap, at lahat ng mga biktima ay nasawi. Gayunpaman, wala pang naiulat na solusyon ang mga pulisya sa mga nabanggit na kaso.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
