BALAYAN, BATANGAS | Nasawi ang isang pulis matapos tamaan ng bala sa ulo habang nagsasagawa ng follow-up operation laban sa isang robbery suspect sa Barangay Sampaga, Balayan, Batangas. Napatay rin ang suspek sa isinagawang hot-pursuit operation ng mga awtoridad.
Kinilala ang nasawing pulis na si Police Staff Sergeant (PSSg) Von Rico Bibaño Macuha, 32, miyembro ng Sta. Teresita Municipal Police Station. Ayon sa paunang imbestigasyon, nagsasagawa ang mga pulis ng follow-up operation kaugnay ng naunang nabigong robbery sa isang convenience store nang mapansin sila ng suspek at umano’y agad na nagpaputok. Tinamaan sa ulo si Macuha at nasawi.
Kinilala naman ang suspek na si Carlo Zape Arcilla, nasa hustong gulang at residente ng Balayan, Batangas. Matapos ang pamamaril, tumakas umano si Arcilla sakay ng motorsiklo patungo sa direksyon ng Barangay Calantas, Calaca City.
Nagpatuloy ang mga awtoridad sa joint follow-up at hot-pursuit operation. Ayon sa ulat, muling nakalusot ang suspek sa isang checkpoint bago siya nakorner sa lugar malapit sa Calle Ruega, sa boundary ng Nasugbu, Batangas at Cavite, kung saan siya napatay ng mga humahabol na awtoridad.
Samantala, personal na dumalaw si Acting Police Regional Director PBGen Dominic L. Baccay sa San Sebastian Funeral Homes sa Barangay San Sebastian, Lipa City upang makiramay sa pamilya ni Macuha at magbigay ng kanyang pakikiramay.
Sa nasabing pagbisita, iginawad ni Baccay kay Macuha ang Medalya ng Kadakilaan (Posthumous) bilang pagkilala sa kanyang katapangan, dedikasyon at pagkamatay habang ginagampanan ang tungkulin. Tinanggap ang medalya ng kanyang asawa.
Nag-abot din si Baccay ng financial assistance mula sa Police Regional Office 4A sa pamilya ng nasawing pulis, habang nagbigay rin ng karagdagang tulong pinansyal ang Provincial Executive Senior Police Officer ng Batangas Police Provincial Office mula sa mga tauhan ng Batangas PPO.
Tumulong naman ang Regional Personnel and Records Management Division sa pagpapaliwanag sa mga benepisyaryo tungkol sa iba’t ibang benepisyong maaari nilang i-claim at sa mga prosesong kailangang sundin.
Sa kanyang libing, binigyan din si Macuha ng mga seremonyang pagkilala at respeto ng kanyang mga kasamahan sa serbisyo. Dumalo rin sa pag-alalay sa pamilya ang mga opisyal mula sa Batangas PPO, Sta. Teresita Municipal Police Station, Lipa City Component Police Station at iba pang yunit ng Police Regional Office 4A.
Patuloy namang iniimbestigahan ng mga awtoridad ang robbery incident at ang mga pangyayaring humantong sa pagkamatay ni Macuha at ng suspek. Ang PNP, sa pamamagitan ng Police Regional Office 4A, ay nagpahayag ng patuloy na suporta sa pamilya ng nasawing pulis, kabilang ang pag-asikaso sa kanilang mga benepisyo.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
- Arman B. Cambe
- Arman B. Cambe
- Arman B. Cambe
- Arman B. Cambe
