Matapos ang kakarampot na rollback, inaasahan ang malaking na pagtaas sa presyo ng produktong petrolyo sa mga susunod na araw.
“Magkakaroon ng pagtaas ng presyo sa gasolina, diesel, at kerosene para sa susunod na linggo, Martes, Pebrero 20,” ayon kay Department of Energy-Oil Industry Management Bureau Assistant Director Rodela Romero, at binanggit ang mga pagtatantya ng industriya ng langis batay sa kalakalan sa nakalipas na apat na araw.
“Ang tinatayang adjustment ay mula P1.10 hanggang P1.50 [bawat litro],” sabi ni Romero.
Ang inaasahang pagtaas ng presyo ng langis sa susunod na linggo ay posibleng dahil sa tumitinding labanan sa Middle East sa Lebanese border, pagtaas ng stockpile ng krudo ng US, pagkagambala sa pagbyahe sa Red Sea at Suez Canal, at ang pagtataya ng OPEC sa malakas na demand para sa 2024.
Karaniwang nag-aanunsyo ng price adjustments ang mga kumpanya ng langis tuwing Lunes, na ipinatutupad sa susunod na araw.
Matatandaan na epektibo noong Martes, Pebrero 13, binawasan ng mga kumpanya ng gasolina ang presyo ng kada litro ng gasolina, diesel, at kerosene ng P0.60, P0.10, at P0.40, ayon sa pagkakasunod.
Ang pinakahuling paggalaw ng presyo ay nagdala sa year-to-date adjustments na tumaas sa net increase na P4.45 kada litro para sa gasolina, P4.30 kada litro para sa diesel, at P0.45 kada litro para sa kerosene.
Sa Metro Manila, ang umiiral na retail prices ng gasolina ay mula P55.90 hanggang P78.35 kada litro, ang diesel ay nasa pagitan ng P53.77 at P67.40 kada litro, habang ang kerosene ay nasa P72.49 hanggang P83.84 kada litro, ayon sa pinakahuling datos mula sa price monitoring ng DOE mula Pebrero 13 hanggang Pebrero 15, 2024.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
