MAYNILA — Opisyal nang nagsimula ang southwest monsoon o habagat sa bansa, ayon sa inanunsyo ng Philippine Atmospheric, Geophysical and Astronomical Services Administration (PAGASA) nitong Sabado, Mayo 30.
Sa inilabas na pahayag, sinabi ng state weather bureau na natukoy sa mga nakalipas na araw ang pag-iral ng southwesterly winds o hanging mula timog-kanluran sa kanlurang bahagi ng bansa. Ayon sa PAGASA, maaaring magpatuloy ito dahil sa pagbuo ng isang tropical cyclone sa Philippine Sea.
Ipinaliwanag ng ahensya na ang habagat ay binubuo ng mainit at mamasa-masang hangin mula sa timog-kanluran na karaniwang nagdadala ng pag-ulan, lalo na sa western sections ng Pilipinas.
Ayon sa PAGASA, ang pagpasok ng westerly winds at pagbabago sa pangkalahatang meteorological pattern ng bansa ay indikasyon ng pagsisimula ng habagat, na isa sa mga pangunahing hudyat ng nalalapit na pagpasok ng tag-ulan. Bilang dominanteng weather system, inaasahang magdadala ito ng paminsan-minsan hanggang madalas na pag-ulan at thunderstorms, partikular sa kanlurang bahagi ng bansa.
Karaniwang tumatagal ang panahon ng habagat mula Mayo hanggang Setyembre, bagaman maaari pa ring magkaroon ng tinatawag na monsoon breaks o pansamantalang paghina ng pag-ulan na tumatagal ng ilang araw hanggang linggo. Sa panahong ito, maaari ring lumakas ang epekto ng habagat kapag may kasabay na tropical cyclone na nagpapalakas sa daloy ng hanging timog-kanluran.
Binigyang-diin ng PAGASA na maaaring magsilbing paunang senyales ang habagat sa opisyal na pagsisimula ng rainy season sa mga susunod na araw. Patuloy namang babantayan ng ahensya ang lagay ng panahon at klima sa bansa.
Pinayuhan din ng PAGASA ang publiko at mga kinauukulang ahensya na maghanda at magsagawa ng pag-iingat laban sa posibleng epekto ng habagat at iba pang weather at climate-related events, kabilang ang pagbaha, landslide, at iba pang panganib na dulot ng matinding pag-ulan.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
- Carlo Juancho Funtanilla
- Carlo Juancho Funtanilla
- Carlo Juancho Funtanilla
- Carlo Juancho Funtanilla
