MAYNILA — Lumilitaw na dikitan sa posibleng 2028 presidential race sina Vice President Sara Duterte at dating Vice President Leni Robredo batay sa pinakabagong Pulse Asia survey na isinagawa noong unang bahagi ng Mayo 2026.
Ayon sa resulta, nakakuha si Duterte ng 51 porsyento ng suporta, habang si Robredo ay may 41 porsyento, o may sampung puntos na kalamangan ang kasalukuyang Bise Presidente. Nasa 8 porsyento naman ang nananatiling undecided.
Sa regional breakdown, nananatiling malakas ang suporta kay Duterte sa Mindanao kung saan umabot ito sa 91 porsyento, kumpara sa 7 porsyento para kay Robredo. Sa National Capital Region, halos tabla ang laban sa 48 porsyento para kay Duterte at 46 porsyento para kay Robredo, na itinuturing na statistically tied. Sa Balance Luzon, nanguna si Robredo na may 55 porsyento laban sa 33 porsyento ni Duterte.
Ayon kay Victor Andres Manhit ng Stratbase Group, hindi nakapagtataka ang malakas na suporta kay Duterte sa Mindanao ngunit mahirap itong mapanatili sa pambansang antas ng kampanya. Binigyang-diin niya na sa kasaysayan ng halalan, bihirang manatili ang napakataas na antas ng suporta tulad ng 91 porsyento sa buong kampanya.
Sinabi rin ni Manhit na kung magpapatuloy sa pagtakbo si Robredo sa pagkapangulo, mahalaga ang pagpapalakas ng suporta sa ibang rehiyon at pagkuha ng undecided voters upang mabawasan ang agwat sa kalaban.
Sa vice presidential race, lumabas si Senador Erwin Tulfo bilang nangunguna na may 46 porsyento, kasunod si Senador Robin Padilla na may 38 porsyento. Si Tulfo rin ang nakapagtala ng pinakamataas na trust rating sa mga personalidad na isinama sa survey sa 63 porsyento, mas mataas kumpara kina Senador Bong Go na may 57 porsyento at Robredo na may 53 porsyento.
Ipinakita rin ng survey na 83 porsyento ng mga respondent ang interesado na sa 2028 elections kahit dalawang taon pa bago ito ganapin. Lumitaw rin na internet ang pangunahing pinagmumulan ng balita ng mga Pilipino sa 83 porsyento, kasunod ang telebisyon na may 64 porsyento, radyo na may 27 porsyento, at pahayagan na may 3 porsyento.
Nauna nang inanunsyo ni Duterte ang intensyon na tumakbo sa 2028 presidential elections. Gayunman, maaari siyang maharap sa posibleng disqualification depende sa magiging resulta ng mga legal na proseso na kinakaharap niya.
Samantala, inihayag ni Robredo na wala siyang planong tumakbo para sa national position at sa halip ay tututok sa muling pagtakbo bilang alkalde ng Naga City.
Isinagawa ang survey mula Mayo 3 hanggang 7 sa 1,500 respondents sa buong bansa.
Si Venus L Peñaflor ay naging editor-in-chief ng Newsworld, isang lokal na pahayagan ng Laguna. Publisher din siya ng Daystar Gazette at Tutubi News Magazine. Siya ay isa ring pintor at doll face designer ng Ninay Dolls, ang unang Manikang Pilipino. Kasali siya sa DesignCrowd sa rank na #305 sa 640,000 graphic designers sa buong daigdig. Kasama din siya sa unang Local TV Broadcast sa Laguna na Beyond Manila. Aktibong kasapi siya ng San Pablo Jaycees Senate bilang isang JCI Senator.
- Venus L Peñaflor
- Venus L Peñaflor
- Venus L Peñaflor
- Venus L Peñaflor
