MAYNILA – Inaasahang madaragdagan ang babayarang singil sa kuryente ng mga konsyumer ngayong Abril 2026 matapos ianunsyo ng National Grid Corporation of the Philippines (NGCP) ang pagtaas ng transmission charges.
Sa advisory na inilabas nitong Miyerkules, sinabi ng NGCP na ang overall average transmission rate para sa March billing period, na sisingilin ngayong Abril ng mga distribution utilities at electric cooperatives, ay tumaas ng 4.26 porsiyento. Umabot ito sa P1.7526 kada kilowatt-hour mula sa P1.6810 kada kWh noong Pebrero.
Ayon sa NGCP, pangunahing dahilan ng pagtaas ang ancillary service (AS) charge. Ito ang mga pass-through cost para sa kuryenteng ibinibigay ng mga power generator na nagsisilbing AS providers tuwing may hindi pagtutugma sa supply at demand ng kuryente. Tumaas ang naturang singil sa P0.8516 kada kWh mula sa P0.8275 kada kWh noong nakaraang buwan.
Nilinaw ng grid operator na hindi sila kumikita mula sa AS charges at wala silang pakinabang sa anumang pagbabago ng presyo nito. Direktang ibinabayad ang mga ito sa mga generation company na may bilateral contracts sa NGCP, gayundin sa Independent Electricity Market Operator of the Philippines (IEMOP) para sa mga serbisyong kinukuha mula sa Reserve Market.
Bukod dito, umakyat din ang transmission wheeling rate, o ang bayad para sa paghahatid ng kuryente sa pamamagitan ng transmission grid, sa P0.7022 kada kWh mula sa P0.6677 kada kWh noong nakaraang buwan.
Ayon sa NGCP, walang epekto sa kanilang kita ang pagtaas ng transmission wheeling rates dahil ang pinahihintulutang revenue ng kumpanya ay may itinakdang limitasyon mula sa Energy Regulatory Commission (ERC).
Binigyang-diin ng NGCP na nananatiling malaking bahagi ng kabuuang transmission rate ang ancillary service charges.
Dagdag pa ng kumpanya, bilang system operator, prayoridad nilang matiyak na nananatiling matatag ang grid sa panahon ng hindi balanseng supply at demand. Hindi umano sila kumikita mula sa AS charges dahil direktang napupunta ang bayad sa mga provider na tumutulong upang mapanatili ang tuloy-tuloy na daloy ng kuryente sa buong bansa.
Carlo Juancho FuntanillaFrontend Developer, WordPress, Shopify
Contributing Editor
AMA ACLC San Pablo
- Carlo Juancho Funtanilla
- Carlo Juancho Funtanilla
- Carlo Juancho Funtanilla
- Carlo Juancho Funtanilla
