LUCENA CITY – Dalawa ang kumpirmadong patay habang umabot na sa hindi bababa sa 39 hanggang 41 ang sugatan matapos mahulog sa bangin ang isang pampasaherong bus ng DLTBCo sa Pagbilao, Quezon noong gabi ng Abril 20, ayon sa mga pinakahuling ulat mula sa mga awtoridad at initial reports.
Sa inisyal na imbestigasyon, bandang alas-otso ng gabi nang mangyari ang aksidente sa Barangay Silangang Malicboy. Ang bus na biyaheng Bicol patungong Maynila ay nawalan umano ng kontrol bago tuluyang sumemplang at mahulog sa malalim na bangin sa gilid ng kalsada.
Naging kumplikado ang rescue operations dahil sa dilim, matarik na lugar, at hirap ng access sa pinangyarihan ng aksidente. Ayon sa mga responder, kinailangan ng mahabang oras bago maiahon ang mga pasahero mula sa pagkakasadsad ng bus.
Agad na isinugod sa iba’t ibang ospital sa Lucena City ang mga sugatan para sa agarang gamutan, habang patuloy ang monitoring sa ilang nasa malubhang kondisyon.
Sa ngayon, wala pang inilalabas na opisyal na pagkakakilanlan ng mga nasawi at ilang sugatan habang isinasagawa pa ang beripikasyon ng mga awtoridad at koordinasyon sa mga pamilya.
Patuloy ang imbestigasyon ng pulisya at mga transport regulators upang matukoy ang sanhi ng aksidente, kabilang ang posibleng mechanical failure, over-speeding, o human error.
Nanawagan naman ang mga awtoridad sa mga transport operators na higpitan ang regular na safety inspection at maintenance ng mga sasakyan upang maiwasan ang kahalintulad na trahedya.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
- Arman B. Cambe
- Arman B. Cambe
- Arman B. Cambe
- Arman B. Cambe
