MANILA, Philippines – Umakyat na sa 10 ang bilang ng mga nasawi matapos matabunan ng pagguho ng lupa ang dalawang bahay sa Barangay Poblacion, Malapatan, Sarangani, ayon sa Municipal Disaster Risk Reduction and Management Office (MDRRMO).
Kabilang sa mga nasawi ang dalawang bata at isang indibidwal na naisugod pa sa ospital ngunit idineklarang dead on arrival. Ayon sa MDRRMO, ang mga biktima ay mula sa dalawang magkahiwalay na pamilya na naninirahan sa lugar. Patuloy naman ang search and retrieval operations habang inaalam ng mga awtoridad kung may iba pang posibleng nawawala.
Sinabi ni Malapatan Mayor Salway Sumbo Jr. na hindi malalim ang natabunang bahagi ng lupa kaya mabilis na nakapagsagawa ng rescue operation ang mga responder. Ayon sa kanya, bandang alas-6 ng umaga ay may naririnig pa umanong boses sa ilalim ng gumuhong lupa ang purok chairman, subalit isa lamang sa mga nailigtas ang naitakbo sa ospital at kalaunan ay binawian din ng buhay.
Ayon kay Malapatan MDRRMO Officer Mark Christopher Quiño, posibleng dulot ng tuloy-tuloy na malalakas na pag-ulan na pinalakas ng Habagat ang pagguho ng lupa. Sinabi rin niyang maaaring nakaambag ang pinsalang idinulot ng magnitude 7.8 na lindol na yumanig sa Sarangani noong Hunyo 8, na maaaring nagdulot ng mga bitak o tension cracks sa kabundukan. Gayunman, nilinaw niyang isinasagawa pa ang masusing pagsusuri upang matukoy ang eksaktong sanhi ng landslide.
Kasunod ng insidente, iniutos ng pamahalaang panlalawigan ang agarang preemptive evacuation sa mga pamilyang nakatira sa mga lugar na itinuturing na mataas ang panganib sa pagguho ng lupa. Ayon kay Sarangani Governor Rogelio Pacquiao, inatasan na ang mga barangay na ilikas ang mga residente sa mga sitio na maaaring maapektuhan habang nagpapatuloy ang malakas na pag-ulan.
Nauna nang nagbabala ang mga awtoridad na mataas pa rin ang panganib ng landslide sa ilang bahagi ng Mindanao dahil sa patuloy na pag-ulan na dulot ng Habagat na pinalalakas ng Bagyong Inday. Pinayuhan ang mga residente sa mga bulubundukin at lugar na may kasaysayan ng pagguho ng lupa na sumunod sa mga evacuation order at manatiling nakaantabay sa mga abiso ng lokal na pamahalaan at ng mga disaster response agency.
Samantala, patuloy pa ring nakararanas ng epekto ang Sarangani at mga karatig-lugar mula sa magnitude 7.8 na lindol noong Hunyo 8. Ayon sa National Disaster Risk Reduction and Management Council (NDRRMC), umabot na sa 92 ang kabuuang napaulat na nasawi sa lindol, bagaman karamihan sa mga ito ay sumasailalim pa sa validation. Naniniwala ang mga awtoridad na ang patuloy na pag-ulan kasabay ng mga bitak na iniwan ng lindol ay nagpapataas ng panganib ng mga kasunod na landslide sa mga apektadong komunidad.
Arman B. Cambe
Si Arman B. Cambe ay naging ABS-CBN news correspondent noong 1987-1989. Naging provincial correspondent ng Headline news, isang national daily tabloid at 10 taong naging Laguna broadcast correspondent ng Radio Veritas. Contributor din siya sa loob ng 5 taon sa Peoples Journal group of companies. Naging Professor ng Journalism at Broadcasting ng 15 taon sa Laguna State Polytechnic University, Sta. Cruz Campus at 5 taon na naging Teacher exchange scholar sa Don Bosco at St. Dominic Institute sa Bangkok, Thailand.
- Arman B. Cambe
- Arman B. Cambe
- Arman B. Cambe
- Arman B. Cambe
